هل أنا خائنة ؟
هل أنا خائنة؟
عمري 26 سنة مخطوبة ... أحب خطيبي وهو كمان يقول أنه يحبني لكن هو غلط فيَّ كثيراً وفي أهلي..وفي مرة تخنقنا قال لي كلام صعب وغلط فيَّ وقررت أفسخ الخطوبة وقال لي في ستين داهية وأنا اللي أصلاً مش عايز أكمل معكِ... يومها حكيت لواحد زميلي كل المشاكل التي حصلت بينا لحد قراري بإنهاء الخطوبة عشان أخذ رأيه كأخ لي والله مش أكتر ومفيش في نيتي أي حاجة وحشة وزميلي كمان نفس الموضوع مفيش جواه حاجة من ناحيتي وهو أصلاً مرتبط...
هو نصحني كأخ وقال لي استخيري ربنا ... بعدها خطيبي صالحني ورفض أننا نسيب بعض ومفسخناش الخطوبة لحد دلوقتي لكن المشكلة أن خطيبي عرف أني حكيت لزميلي ومن ساعتها كل شوية في أي موقف وأي مشكلة يجيب سيرة الموضوع ده ويشتمني بأبشع الألفاظ مينفعش أذكرها هنا (الألفاظ التي تقال على البنت اللي مش مؤدبة) ويقول لي أنتي واحدة خائنة وخنتيني يا كذا يا كذا ومثلاً لو طلبت منه أنه ميحكيش لمامته حاجة خاصة بينا يقول لي أنتي حكيتي لفلان يا كذا كذا ...
أعمل أيه معه؟؟ أنا عارفه أني غلطت أني حكيت لزميلي بس أنا محكيتلوش مشاكلنا ونحن مخطوبين نحن كنا قررنا نفسخ الخطوبة وأنا كنت عايزة أخد رأي حد يقول لي أنا غلطانة ولا لأ في قراري لأن أنا بحب خطيبي جداً ومكنتش عايزة أسيبه ومكنتش قادرة أصدق أن خلاص هنسيب بعض وكان نفسي بس حد يقول لي أعمل أيه عشان أصلح الموضوع بينا وهو كان دائماً يحملني مسؤولية أي خلاف بينا وأني المفروض أعمل كذا فكنت عايزة أخد رأي حد يقول لي أنا كنت غلطانة في الخلافات فعلاً ولا لأ أخذت رأيه كأخ ومفيش بيني وبينه أي حاجة ...
أنا عارفه أني غلطت ... بس هل أنا أستأهل الشتايم دي كلها وأنه يقول عليا خائنة؟ هل ربنا سيعاقبني ؟؟ هل أنا فعلاً غير مؤهلة أبقى زوجة صالحة ... خطيبي يقول لي أني مينفعش أبقى زوجة صالحة أحفظ رَجُلي وبيتي وأولادي ...أنا طلبت منه لو هو شايفني بالشكل ده يسيبني ويفسخ الخطوبة ويشوف واحدة غيري تنفع زوجة صالحة ... يرفض يسيبني ويعتذر ويقول أنه يحبني وأن مفيش في أخلاقي وأدبي وأنه مصر يكمل معايا .....
لكن كل ما تحصل مشكلة أو أطلب منه مامته متدخلش في حياتنا يقول لي أنتي بالذات متكلميش عن الخصوصية أمي دي لحمي ودمي لكن أنتي خليتي الغريب ينهش في عرضي
28/3/2017
الردأ. زهـراء حسين الموسويالسلام عليكم ورحمة الله وبركاته
الأخت العزيزة "رنا"
بالطبع السلوك الذي عملته بغض النظر عن أنه صحيح أم خاطئ هو ليس خيانة لكن بالنسبة لزوجك أصبح هذا الأمر جرحاً عاطفياً لا يلتئم.
وإذا بقي ينزف من هذا الأمر بالطبع استمرار حياتكما بسلام ومحبة سوف يكون أمراً صعب التحقيق.
لذلك يجب أن توضحي له بهدوء ودون عصبية بأنك متألم من هذا الموضوع وغير قادر على التكيف معه ولذلك تجرحني باستمرار. فإما تتسامح مع هذا الموضوع وتتوقف عن التطرق له إلى أن يخف تأثيره عليك بالتدريج أو تراجع استشارياً لمساعدتك على التغلب عليه أو سوف نستمر بجرح بعض إلى أن ينتهي الحب بيننا وينمو النفور.
واسمحي له أن يأخذ الوقت الكافي كي يقرر الاختيار الذي يريده واسأليه هل لديك اختيار آخر ؟ وفي ضوء اختياره أنتِ تقررين هل تستمرين معه أم لا.
تمنياتي لك بالتوفيق
هذا الردّ توعية ودعم، وليس تشخيصًا ولا بديلًا عن مقابلة مختص. إن كنت في خطر الآن فاتصل بالطوارئ في بلدك.