شعب مسطوووول

 شَعْب مَسْطول.. شَعْب تَايه
 شَعْب بِيْموت فِ الكَلام
 كِلْمةْ بِتْوديه تِجِيبُه
 والزَّعِيمْ "عَادِل إِمَام"
 الَّلي مُشْ عَجْبُه يَا وِيلُه
 والِّلي عَجْبُه.. يَا سَلامْ!
 ********************
 شَعْب فِرْعُوني عَنِيد
 الِّلي بِتْقول فِيه تِعِيد
 تِضْرَبه عَلَى رَاسُه يِخْشَع
 لَوْ سَايِسْتُه مُشْ تَمَامْ!
 ********************
 شَعْب فَالِح فِ التشرُّد
 يُوم مُظَاهرة ويُوم "تَمرُّد"
 أَصْلُه بِيْعَوَّض سُكَاتُه
 كَان "صَنَمْ" مِنْ أَلْف عَامْ!
 ********************
 أَكْل.. نُوم.. يا اللَّه السَّلامة
 بُكْرة تِطْلع لُه النَّدَامة
 كَاشْفَة رَاسْها.. بِوِشْ بُومَة
 كَالْحَة مِنْ غِير ابْتِسَامْ!
 ********************
 شَايَلِ المُلُوتُوف فِ إِيِد
 أَوْ رُصَاصَة وسَيفْ حَدِيدْ
 إِمَّا يِفْرِض فِينَا رَأْيُه
 أَوْ يِحَوِّلْها لْحُطَامْ
 ********************
 عَامِل فِيها إِنُّه فَاهِم
 بُقُّه بِيْطَرْطَشْ شَتَايِم
 عَ الِّلي رَايِح والِّلي جَاي
 دَا خَرُوف ودُول نَعَامْ!
 ********************
 شَعْب غَرْقَان فِ البَلادَة
 حَنْ لِلْكَابْ والبِيَادَة!
 إِمَّا عَسْكَر أَوْ بَلاشْ
 أَصْلُه لِلأمَانْ صِمَامْ!
 ********************
 اصْحَى فُوقْ يَا شَعْب واعْقَل!
 اقْرَا.. حَلِّل.. جَرِّب.. اسْأَل
 اوْعَى مِ التَّسْميع وِفَكَّر
 إِمَّا عَلَّقْ لِكْ لِجَامْ!
 ********************
 حَاشِر الإعْلامْ فِ رَاسَك
 والِّلي فِيْه لابْسُه مَدَاسَك
 بَطَّل الفُرْجة وِقَرَّر
 وِأْوعَى تِأْمَن للِّئامْ!
 ********************
 لِيه يَا شَعْبي؟ يَا خُسَارةْ!
 هِي دِي بَرْضُه الحَضَارَة؟!
 فِين نَبَاهْتَكْ لِلْمَكَايِد
 وَالْمَحَبَّة والوِئَامْ
 ********************
 واللَّه لَوْ مِنُ "مُرسِي" أسِيبْها
 تِتْحِرق هِيَ ونَصِيبْها
 يَاكْشِ تِوِلَعْ فِيهَا نَارْ
 خُدْها مِنِّي.. والسَّلامْ!
 16يونيو 2013
 
 واقرأ أيضًا :
  شخير في غرفة مجاورة / نُخْبة! / يد غليظة تطرق الأبواب بعنف / عائد إلى الأرض / بدر / كان جدي.. وكان / القَدَرُ المسكوب / قطار آخر الليل