شعر عامية
رسالة إلى مصر في عيدها
أنا شاب مصري ومنى عيني
أزرع ورودي فـ كفينك
وارويها من مية عيني
وامسح دموع طرفة عينك
*********
أنا شاب مصري وأدواتي
عرقي وطيني ومحراتي
فاسي دا تاج راسي وعزي
وسلاحي من قمحي ورزي
وكوني مصري دا من حظي
خلاني أدور على ذاتي ;
*********
أنا شاب مصري وسواحلي
والمية ياما بتشوح لي
منك وليكي ومين غيرك
ماهو كله من فضلة خيرك
يادنيا حلوة ومسيرك
بكرة هتحلى وهتحلي
*********
أنا شاب مصري وصعيدي
وبكرة دا فـ قلبي وإيدي
راسم طريقه وهوصله
وأقعدك يامة فـ ضله
واحميكى م اللي بيخلوا
عيوني تبكي فـ يوم عيدي
*********
أنا شاب مصري ومن سينا
زرع الرجولة نبت فينا
إحنا عيونك وأبوابك
ونار بتحرق أغرابك
وقبل ما يخطّوا ترابك
يخطّوا ياغالية علينا
*********
أنا شاب مصري ومنى عيني
أزرع ورودي ف كفينك
وأرويها من مية عيني
وأمسح دموع طرفة عينك
واقرأ أيضاً:
ذَوَبَـان! / عبث الفرشاة! / قِـطَّـةٌ،،/ آخر العمى / جوع / أحتاج عينيك / لو مرةً