إلى مدمن!!!

 الحسبة كانت غلط وانت أكيد خسران
إزاي تبيع صحتك للكيف وللإدمان
من غير ما تاخد تمن
غير لحظة التوهان!
والمال يضيع، والبيت..
يتهد، والإنسان.. تايه ف ليل السُطْل
 وف بلوته غرقان

**
عايش يشرب بانجو ويبرشم لجل ما ينسى
ويعبي الماكس ف دمه
والهيروين عشقه وهمه
دا يبيع الدنيا بحالها ولا إنه يبطل شَمّه
ما هو كيفه اتمكن مِنَه
**
بستغرب ع الإنسان علِّم نفسه الإدمان
وبدَرْ بِإدِيْه البذرة ف ترابة نفسه الخصْبة
كان لازم طبعًا تطرح طرح ندامة وخسران
**
والنفس ف أصلها طفلة لو عودتها على خصلة
تديها شوية لذة العادة هتقلب نشوة
والنفس هتصبح عاشقة وتسوق فيها الإدمان
والحق على الإنسان
**
ما تلومشي غير على نفسك
ياللي اخترت طريق نحسك
وانت اللي مشيته بخاطرك
كان همك تنسى همومك ويعدي مفرفش يومك
واهي جت ف الآخر ضدك والصحة بقت على قدك
**
كنت بتهرب من إيه؟
فيه شيء إنت مخبيه؟
من حزن بتهرب منه؟
وأمل ما رضيش توصل له؟
ولا حبيبك من هجره.. سابك تسهر لياليه؟
وفضلت مصاحب كاسك ومونِّس ليلك بيه
**
كلنا عايشين ف الأزمة
والدنيا ما هياش راحمة
كل الخلق ومش سايبة بنى آدم خالي هموم
لكن الإنسان الراجل
شايل أحزانه وراحل
يصحى ف أيام فرحان وليالي يبات مهموم
والحكمة ف خلق الدنيا
إن الأحوال مش دايمة
حزن بيتبدل فرحه! ضحكة بتغرق ف الدمعة
ويفوت العمر بسرعة ليلة بتجري ورا  يوم
**
طب ليه م الدنيا بتهرب؟
من بدري تسيب الملعب؟
علشان الحظ معاند؟ والدنيا بتضرب جامد؟
مع إن ما حدش يكسب من غير ما يعاني ويتعب
**
لكن انت بسرعة زهِقْت
وعلى الدنيا استعجلت إنها لازم تضحك لك
وبإيدك تخطف حظّك وتسَلْطَنْ جَوْ لنفسك
ما عرفتِشْ إن نهايتك
مع رحلة كيفك بدأت!
توهت دماغك تهت بالبرشام هلوست
لكن مشكلتك فضلت
وانت اللي بإيْدَكْ مُتّ!.

واقرأ أيضا:
  سباعيات المجنون الفصيح بعد 30/ العشق الصعب/ خصام الحبايب/ الحب القاسي/ زمن الغابة/ نغومة بنتي/ حكاية عاشق/ الغربة/ إلى مريض الهوس/ إلى مكتئب/ إلى مكتئب !/ إلى مريض الفصام/ إلى مريض الوسواس