شعر عامية
أفندينا أنعم علينا بعلاوة
أفندينا أنعم علينا بعلاوة
تجيب كيلو جبنة وعلبة حلاوة
آتاري العلاوة مجرد أتاوة
وإحنا علينا الكلام اختلط
*****
عشان في البداية حسبناها خير
وقلنا نواية حتسند يا زير
وحسنة حتمنع بلاوي كتير
وكنا حقيقي في غاية العبط
*****
في لحظة افتكرنا إن لينا حقوق
ونمنا وصحينا لقينا الخازوق
وقبل اما حتى يا عالم نفوق
لقينا اللي لسه حناخده اتشفط
*****
أفندينا يعني في لحظة تجلي
تعطف تلطف وقرر يخللي
مساحة الغلابة تزيد ستة مللي
وياكلوا بدال التراب الزلط
*****
أفندينا أعلن صدور القرار
وقبل اما ينجح في أي اختبار
فوجئنا بزفة ومولد وزار
قصايد.. جرايد.. برامج.. يفط
*****
تؤكد بأن الحكومة.... بذكاء
ومن حزمة واحدة قضت ع الغلاء
ولابد يبقى لدينا... انتماء
وناكل ونشرب ونلبس خطط
*****
عبال النمو اللي قالوا عليه
وحايشينه عنا مانعرفش ليه
ماتلمح مكانه في مراية عينيه
ونقدر ندوق منه... حتى نقط
*****
مادام كل حاجة تمام ع الورق
مفيش أي داعي عشان القلق
ولو مش مصدق خلاص اتفلق
ورقـنا اللي صح وكلامك غلط
*****
قاللي مواطن عليم بالخبايا
أفندينا قرر تزيد الجباية
عشان شعبه جاحد قليل الرباية
بياكل وينكر زي القطط
*****
إذا الشعب صدى بفعل البارومة
حا تعمل حسابه ف ايه الحكومة
وهي اللي جاهزة بكرباج وشومة
عشان لوفي واحد في عقله اتخبط
*****
تعيش مصر دايما في عز وجمال
يعيش المواطن شـديد الاحتمال
وآمن تماما من الاشــــتعال
وأقصى ما عنده.... ينكت فقط
واقرأ أيضا:
كلماتٌ على مِقْصلة الحلم: / لستُ أنـا ! / فَـداحَـهْ ! / بَعْدُ وَبَعْدُ... / فِـقْـهُ الرَّغْـبَةِ ! / وجوهٌ شتي !! / عسى..يا عَسى! / سببٌ مَبْـحُـوح !